Qarshi Abu Ali ibn Sino nomidagi Jamoat salomatligi texnikumi

1946 yil 21-fevralda sobiq SSSR sog’liqni saqlash xalq komissarligi chiqargan 3-qarorga asosan Qarshi shahrida feldsher-akusherlar maktabi ochildi. Maktab uchun shahar shifoxonasi binosidan ikkita xona ajratiladi. O’sha yili feldsher-akusherlar maktabiga 31 ta talaba qabul qilinib, o’quv mashg’ulotlari boshlab yuboriladi. Qabul qilingan o’quvchilarning hammasi 1949 yilda mazkur maktabni tamomlab, viloyatning turli joylariga yo’llanma oladilar. Qarshi feldsher-akusherlar maktabi 1950 yildan etiboran kengaya boradi va 2-qabulni boshlashdan avval bilim yurti uchun talabga javob beradigan yangi o’quv binosi qurilib ishga tushiriladi. Xom g’ishdan qurilgan yangi binoda 12 ta o’quv xoonasi tashkil etiladi. Bilim yurtida 1946 yilda birgina davolash ishi bo’limi faoliyat ko’rsatgan bo’lsa, 1949 yildan boshlab hamshiralik ishi bo’limi ham tashkil etiladi. Oradan 3 yil o’tib, 1952 yilda bilim yurtida akusherlik ishi bo’limi ham ochiladi. 1957 yilga kelib Qarshi tibbiyot bilim yurtining qamrovi, o’rta malakali tibbiyot xodimlari tayorlash imkoniyatlari yanada kengayib, viloyatning sog’liqni saqlash ehtiyojlarini qondirish maqsadida ish olib boriladi. Jumladan, xuddi shu yili farmasevt dorishunoslik bo’limi bo’yicha ham talabalar qabul qilinishi yo’lga qo’yiladi.